လူဆိုတာ စည်းကမ်းရှိရပါတယ်၊ စည်းကမ်းရှိမှသာ တိုင်းပြည်တပြည် တိုးတက်တယ်၊ ဒီအခမ်းအနားမှာ ငြိမ်ငြိမ်နေသင့်တဲ့ အခမ်းအနားဆိုရင် ငြိမ်ငြိမ်ကိုနေရပါတယ်။
အပ်ကျသံကြားလောက်အောင် ငြိမ်ရပါတယ်၊ အဲဒါမှ စည်းကမ်းရှိတယ် လို့ ခေါ်တယ်၊ စည်းကမ်းရှိတဲ့လူမျိုးမှ တိုးတက်တယ်။
ကဲ ရှင်အောင်ဆန်းစုကြည် ညည်းလဲ တော်တော်ပင်ပန်းလာပြီ၊ ငါ တိုတိုလေးပြောမယ်၊
ဒို့ဘုရားရှင်က
ဝိ၀ါဒံ ဘယတော ဒိသွာ၊ အ၀ိဝါဒဉ္စ ခေမတော။
သမဂ္ဂါ သခိလာ ဟောထ၊ ဧသာ ဗုဒ္ဓါန သာသနီ။ ဘုရားရှင်တိုင်း ဆုံးမထားတဲ့အဆုံးအမရှိတယ်၊
ဝိ၀ါဒံ= အချင်းချင်းငြင်းခုံခြင်း ခိုက်ရန်ဖြစ်ခြင်း အထင်အမြင်လွဲခြင်း သဘောထားကွဲလွဲခြင်းကို၊
ဘယတော- ကြောက်ဖွယ်မအေး ဧရာမဘေးကြီးလို့၊
ဒိသွာ မြင်ကြစမ်းပါ။
အ၀ိဝါဒံ= အချင်းချင်း မငြင်းမခုံ ခိုက်ရန်မဖြစ် သဘောထားတူညီခြင်းကို၊
ခေမတော- ငြိမ်းချမ်းရေးလမ်းစဉ်ကြီးလို့ မြင်ကြစမ်းပါ။
အဲဒီလိုမြင်ပြီး ဘာလုပ်ရမှာလဲ၊ သမဂ္ဂါ-ညီညီညွတ်ညွတ် နေကြပါ။
သခိလာ၊ ပြေပြေပြစ်ပြစ် ဆက်ဆံကြပါ။
ဧသာဗုဒ္ဓါနသာသနီ- အဲဒါဟာ ဘုရားရှင်တိုင်းရဲ့အဆုံးအမပဲ။
ညည်းအဖေ ဗိုလ်ချုပ်အောင်ဆန်းက ပထမဆုံးအကြိမ်လုပ်တဲ့ ဖ-ဆ-ပ-လ ညီလာခံမှာ သံဃာတော်အရှင်မြတ်များကို အထူးလျှောက်ထားတဲ့ စကားရပ်ပါတယ်။
သံဃာတော်အရှင်မြတ်များကို တပည့်တော် အထူးလျှောက်ထားပါရစေ။
တပည့်တော်တို့ မြန်မာနိုင်ငံဟာ မညီညွတ်ပါဘူးဘုရားတဲ့၊
အဲဒါ အရှင်ဘုရားတို့က ညီညွတ်ရေးရအောင် တရားဟောပေးပါဘုရားတဲ့။ ဒါက နံပါတ်(၁)။
နံပါတ်(၂)က တပည့်တော်တို့ ဗမာနိုင်ငံ လူမျိုးတွေဟာ လူအ လူနတွေပါဘုရား၊
အဲဒီ လူအလူနတွေကို လူအလူနဘ၀က လွတ်မြောက်ရေးရသွားအောင် အရှင်မြတ်တို့က ကူညီပြီး တရားဟောပေးပါဘုရားလို့ ပထမဆုံးအကြိမ်လုပ်တဲ့ ဖ-ဆ-ပ-လ ညီလာခံမှာ ညည်းအဖေ ဗိုလ်ချုပ်ဆောင်ဆန်းက လျှောက်ထားသွားတဲ့ စကားတရပ်ရှိတယ်၊
အဲဒီ သူလျှောက်ထားသွားတဲ့ အတိုင်းပဲ ညီညွတ်ရေးရမှ တိုင်းပြည်တိုးတက်မယ်။
(၁၃၆၄-ခု၊ နယုန်လပြည့်ကျော်(၈)ရက်)
မစိုးရိမ်တိုက်သစ်ကြီးများ၏ ပဓာနမဟာနာယကချုပ်ဆရာတော်
ဘဒ္ဒန္တရာဇဓမ္မာဘိဝံသ
(အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မဇောတိကဓဇ)
No comments:
Post a Comment